Mae Adran Gwleidyddiaeth Ryngwladol Prifysgol Aberystwyth, gyda chefnogaeth Partneriaeth Hyfforddiant Doethurol Cymru yr ESRC (DTP Cymru), yn gwahodd ceisiadau am y canlynol:
Ysgoloriaeth Ymchwil DTP Cymru yr ESRC
Bwriad yr ysgoloriaeth yw cefnogi ymchwil a fydd yn datblygu astudiaeth gymharol o ymdrechion gan lywodraethau is-wladwriaethol i hyrwyddo integreiddio polisi, gan astudio enghreifftiau o weinyddiaethau ar draws y Deyrnas Unedig a hefyd trwy astudio detholiad o achosion a ystyrir fel enghreifftiau nodedig o integreiddio polisi yn y cyd-destun Ewropeaidd ehangach. O ganlyniad, bydd yn cloriannu’n feirniadol dulliau o integreiddio polisi a phrif-ffrydio polisi ar draws ystod o feysydd polisi cyhoeddus, a gallai hyn gynnwys cydraddoldeb, cynaliadwyedd amgylcheddol a chynaliadwyedd ieithyddol.
Mae’r ysgoloriaeth yn rhoi pwyslais ar hybu cyfnewid gwybodaeth ac yn sgil hynny bydd yn cynnwys cydweithio â swyddogion o Lywodraeth Cymru a swyddfa Comisiynydd Cenedlaethau’r Dyfodol Cymru. Bydd hyn yn cynnwys cyd-drefnu dau weithdy lle bydd rhai o ganfyddiadau’r ymchwil yn cael eu cyflwyno. Diolchwn iddynt am eu cefnogaeth i’r prosiect hwn.
Dyddiad cau ceisiadau: 21 Mai 2018
Ceir manylion llawn, gan gynnwys sut i ymgeisio, cymhwyster, goruchwylio a thelerau ac amodau yma.
